นิทานที่ 34 มหาโซค

 

 

โคสะกะ เศรษฐีเฒ่า             เข้าพบพระยาเมือง

ได้ยิน หมอโหรทวาย           ฤกษ์เซงไซกล้า

เด็กเกิดมา  ในวันนี้             ราศรีมหาฮั่ง

ภายหน้า พอใหญ่ขึ้น           สิเป็นเจ้าทรัยพ์สิน

 

พอตาเว็น เบี่ยงคล้อย          เฒ่าก็จากโฮงพระยา

มาตามทาง เลยพบ             ลูกชายเขาถิ้ม

ส่งเสียง แอวแอไห้              แคมทาง ดวงสิเด่น จริงลือ

จึ่งสั่ง คนฮับใช้                   เอาเมือเลี้ยงอยู่เฮือน

 

เจ็ดวัน เมียของเศรษฐีเฒ่า   เลยประสูติบุตรซาย

แนวคิด หวงสมบัติ              จึ่งเกิดมีในหัวเฒ่า

ซายที่ เอามาเลี้ยง              สิซิงมูนสืบทอด ละนอ*

ควรตัด ไฟแต่ต้น                ควรฆ่าก่อนแย่งมูน

 

จึ่งสั่ง แบเบาะเด็กปล่อยไว้    ตามคอกของงัว

หวังให้ ฝูงงัวเดิน                 เหยียบตายซายน้อย

คนเลี้ยงงัว มาพ้อ                เลยเอาไปเลี้ยงล่ำ

ข่าวแผ่ ไปฮอดเฒ่า             จึ่งน้ำซื้อไถ่คืน

 

บ่ดน เอาเด็กไปปล่อยไว้       ตามฮ่อมทางเกวียน

คู่งัวเกวียน หยุดเดิน            เมื่อเห็นแอน้อย*

คนขับเกวียน  เลยอุ้ม           เอาเมือเฮือนเลี้ยงต่อ

เศรษฐี ไปขอถามไถ่ซื้อ        ซายน้อยดั่งเคย

 

เด็กทั้งสอง ใหญ่ขึ้น             พอแล่นเริงสนุก

เศรษฐี มีสานส์เถิง               ซ่างไหให้เตรียมฆ่า

คันว่า มันถือสานส์เถิงแล้ว    เอาลงไหไฟจูด โลดเด้อ

แล้วจึ่ง ให้ลูกเลี้ยง               นำสาส์นน้อยฮอดซ่างไห

 

ตอนนั้น ซายผู้น้อง             เล่นม่วนอยู่กลางลาน

หมากบ้า พาเสียเงิน*          จึ่งออดวอนนำอ้าย

ข้อยจัก ไปแทนเจ้า             สิเอาสาส์นไปส่ง

อ้ายจง เล่นเปลี่ยนข้อย        เกมแก้กวดเงิน คืนถ้อน

 

เพียงแต่ ยอยื่นสาส์นส่งให้   ซ่างไหเฮ็ดตามแผน

มัดขด เอาลงไห                  จูดเผาตายเสี้ยง

ฮู้ข่าว เศรษฐีตีเอิกแค้น        บุตรซายตายจาก

กูต้อง จัดการฆ่าลูกเลี้ยง      บ่ยอมให้สืบมูน กูแล้ว

 

ลูกเลี้ยง เติบใหญ่ขึ้น           เป็นบ่าวโสมสเลา

เศรษฐี ใช้ให้เอาสาส์นไป     ส่งอาวเมืองใกล้

เมื่อยหลาย เลยหลับม้อย     ลูกสาวอาวลักอ่าน

หลงฮักซาย ซ่อยเปลี่ยนแก้  คำซี้สั่งพ่อตน

 

คำว่า เมื่อมันมาฮอดแล้ว      ให้ปลิดซีพโดยพลัน

หันเปลี่ยน เมื่อใดมันมาเถิง   ให้ฮับเป็นเขยไว้

คล้อยค่ำ อาวคืนเหย้า          เห็นสาส์นใจซ้อยซื่น

แต่งให้ เขาทั้งสองฮ่วมซ้อน  ครองเหย้าสืบมูน หั้นแล้ว

 

ข่าวฮอด หูพี่อ้าย                 สลบถ่าวเหลือใจ

จึ่งสั่ง สองผัวเมีย                 ต่าวยาม เตรียมแผนฆ่า

แต่ว่า เศรษฐีตรอมใจสิ้น       ตายไปในมุ้งม่าน

ลูกไภ้ ลอบเขียนสาส์นสั่งไว้   สมบัติให้คู่แต่งงาน

 (17 มกรา 2011)

 

* ซิงมูน - แย่งมรดก

* แอน้อย - ทารก